Әлмәт – тырыш хезмәтчәннәре белән абруйлы

Соңгы елларда авыл хуҗалыгына булган игътибар, кайгыртучан караш бу тармакның берникадәр алга китүенә җирлек булып тора. Дистә еллар дәвамында җирдән аерылмыйча, эшне барлык юнәлешләрдә дә грамоталы итеп оештыра алган хуҗалыклар бар.

Шундыйларның берсе.Н.Е.Токарликов исемендәге ачык акционерлык җәмгыяте. 2005 ел нәтиҗәләре буенча ул РФ иң яхшы 100 хуҗалыклары исемлегенә кертелде. 20 ноябрь көнне без, район башлыгы киңәшчесе Ф.Г.Миннебаев җитәкчелегендә әлеге хуҗалыкта булдык, алдынгы хезмәтчәннәр белән очраштык.

Токарликов исемендәге ААҖ Әлмәт муниципаль районы авыл хуҗалыгы җирләренең биштән бер өлешен били. 21 мең гектардан артык мәйданның 15 мең гектары сөрү җирләре. Алдан билгеләп узганча, биредә күптөрле юнәлешләр буенча эшчәнлек алып барыла, иң алга киткәне ит һәм сөт җитештерү. Акционерлык җәмгыяте директоры Р.Г. Исхаков сүзләренә караганда, хуҗалыкта мөгезле эре терлек санын арттыру, республика, район җитәкчелеге тарафыннан куелган бурычларны үтәүгә зур игътибар бирелә. Узган елның шушы чоры белән чагыштырганда терлекләр саны 400гә артып, бүгенге көндә 5200 баш исәпләнә. 2013 елның 1 январенә бу күрсәткечне 5300 җиткерү максаты куелган. Очрашу барышында хуҗалык җитәкчесе “СМП – Нефтегаз” компаниясенең инвестор буларак материаль – техник базаны ныгыту, нәселле маллар алу һәм башка барлык юнәлешләрдә һәрдаим ярдәм күрсәтүе хакында сөйләде.

Икътисадый һәм иҗтимагый яссылыкта гына түгел, үз эшен намус белән, лаеклы башкаручы хезмәтчәннәре белән дә горурлана ала Н.Е. Токарликов җәмгыяте. Хуҗалыкта 32 ел сыер савучы булып эшләгән Юртова Татьяна Ивановна быел Казанда узган Авыл хуҗалыгы хезмәтчәннәре бәйрәмендә “Татарстан республикасының атказанган терлекчесе” дигән югары бүләккә лаек булды. “ Мондый тантаналы чарада Президент кулыннан шундый зур бүләк алу, эшемне, гомумән авыл хезмәтчәннәренең тырышлыгын бәяләү дип кабул итәм” – ди ул.
Татьяна Ивановна Яр Чаллы шәһәрендә эшләп кайтаканнан соң Кәләй авылына тормышка чыга һәм 1980 елда сөтчелек – товар фермасына машина белән саву операторы булып эшкә килә. Әлеге еллар дәвамында ул үзен дисциплиналы, тырыш хезмәткәр итеп таныта. Үз эшенең остазы булу аңарга җитештерелгән продукциянең күләмен генә түгел, сыйфатын арттырырга да мөмкинлек бирә. Соңгы берничә елда хуҗалыктагы бер сыердан уртача савым 3650 кг. булса, Татьяна Юртованың күрсәткече 4398 кг.

Производствода эшләү белән беррәттән ул авылның ижтимагый тормышында актив катнаша, күп кенә яшьләрнең остазы булып тора.

Тиздән оешуына 60 ел тулуны билгеләп үтүче шәһәр, район тарихы Татьяна Юртова кебек чын фидакәрьләр, тырыш хезмәтчәннәр белән абруйлы.

Фәрдия Хәсәнова, “Яшьләр заманы” газетасы