Күп калмады Яңа елга да

Календарьдә ноябрь ае. Ике-өч көн элек кенә явып узган беренче кар тиздән Яңа ел җитүен искәртә. Димәк, бу бәйрәмгә әзерләнә башларга да вакыт җиткән. 14 ноябрь көнне Әлмәт муниципаль районы башкарма комитеты җитәкчесе урынбасары Н.А.Богданчиков җитәкчелегендә узган киңәшмә нәкъ менә әлеге мәсьәләгә багышланды. Зур залга шәһәр һәм районның оешма, предприятие җитәкчеләре чакырылган иде.

Николай Богданчиков ассызыклап узганча, һәрбер хезмәт коллективы шәһәрне Яңа елга әзерләүдә актив катнашырга тиеш. Бизәү эшләрендә, беренче чиратта, яңалык кертү, узган елгыларны кабатламау таләп ителә. Ул, шулай ук, “Радиоприбор” заводы эшләп чыгара торган энергияне саклаучы гирляндаларны кулланырга киңәш итте. Шунысын да әйтеп узарга кирәк, шәһәрне бизәүче аллы-гөлле утлар торак йортларда яшәүчеләр уйлаганча алар кесәсеннән түгел(ОДН буларак), урам линияләренә тоташтырыла.

Шәһәрне төзекләндерү генә түгел, Яңа елга бизәү буенча да нефтьчеләребез һәрвакыт үрнәк. Башкарма комитет җитәкчесе башкаларны да аларга тигезләшергә, бизәгән вакытта яңа элементлар кертергә, заманча техологияләрне кулланырга чакырды.

Башкарма комитет җитәкчесенең мәгариф һәм мәдәният буенча урынбасары Василий Самойлов ТОСМС һәм аларның баш предприятие җитәкчеләренә мөрәҗәгать итеп, шәһәр урамнарына куелачак Яңа ел чыршыларын һәм халык күпләп йөри торган ишек алларын бизәүгә игътибар бирергә кирәклегенә басым ясады. Зур чыршылар, гадәттәгечә, “Нефтьче” мәдәният йорты каршысында, Иске Әлмәттә, СУ-2 микрорайонында, “Мегаполис” каршында һәм Түбән Мактамада куелачак.

Реклама һәм информация департаменты җитәкчесе Илдар Зиннәтуллин киңәшмәгә килүчеләрне үзәк чыршыны бизәү планы белән таныштырды, яңалыклар турында сөйләде.

Әлмәт барыбыз өчен дә туган шәһәр буларак, аны бизәү, кешеләргә кәеф күтәренкелеге бүләк итәрлек атмосфера булдыру барыбызның да бурычы. Бу эштән сәүдә предприятиеләре дә читтә калмаска тиеш. Тәрәзә яки ишек өсләренә берничә гирлянда куеп, “миннән киткәнче, иясенә җиткәнче” дип башкарылган гамәлләр белән генә чикләнмик. Халыктан еш кына Менә Чаллыда матур, Казанда искиткеч дигән фикерләр ишетергә туры килә. Шәһәребезнең чыннан да матур булуын теләсәк, үзебезгә дә активрак булырга, инициатива күрсәтергә кирәктер.

Ф. САБАЛЫ