Ирешелгәннәр чик түгел

10 ноябрь көнне “Бердәм Россия” сәяси партиясе Татарстан төбәк бүлекчәсе Әлмәт җирле бүлекчәсенең XXI конференциясе булып узды.

Аның эшчәнлегендә партиянең төбәк бүлекчәсе сәяси советы әгъзасы, ТР Мәгариф һәм фән министры урынбасары Людмила Нугуманова, ТР Профсоюзлар федерациясе рәисе, ТР Дәүләт Советы депутаты Татьяна Водопьянова, РФ Дәүләт Думасы депутаты Ришат Әбүбакиров, ТР Дәүләт Советы депутатлары Генар Газизов, Гүзәл Еремеева, Николай Кольгин да катнашты.

Әлмәт җирле бүлекчәсе секретаре Мәҗит Салиховның бүлекчә тарафыннан быелның 9 аенда башкарылган эшчәнлеге турындагы чыгышы уңай тәэсирләр калдырды: башкарылган эшләр байтак, Әлмәттә булган проблемалар чишелеш таба, яшәү шартлары яхшыра, дәүләт программалары тормышка ашырыла. Киләчәктә дә әлеге юнәлеш сакланачак. Тулаем Татарстан ил күләмендә алдынгы республикаларның берсе булып аерылып тора. Татьяна Водопьянова әйтүенчә, “хезмәтнең лаеклы нәтиҗәсе бар”. Республикада эшсезлек кимегән – бу күрсәткеч. Әмма 22 % (бүгенге көндә эшсезлек әнә шулай билгеләнә) бу юнәлештә катгый чаралар күрергә, яңа эш урыннары булдырырга кирәклекне күрсәтә. Ришат Әбүбакиров та моны ассызыклады. Аның фикеренчә, “яңа эш урыннары булдыручыларны беренче көннәрдән үк аларга игътибар юнәлтүче салым инспекциясе һәм башка службаларның һөҗүмнәре куркыта”.

Татарстанда 10 мең сум хезмәт хакы алучылар саны да 2 тапкырга кимегән. Әлмәт буенча уртача хезмәт хакы югары булса да (мәгълүм ки, нефтьчеләрнең күрсәткечләре илә генә ул шулай), чынлыкта ул 10 меңне генә тәшкил итә. Бюджет өлкәсенә эшкә килергә атлыгып тормау да шуңа бәйле. Сыйфатына караганда бәясе артык югары булган коммуналь хезмәтләр халыкта ризасызлык тудыра; үз кеременә генә торак алуны безнең гасыр кешесе күз алдына да китерми, социаль ипотекага керү дә күпләрдә шик тудыра; сәламәтлек саклау өлкәсендә күпме чишелмәгән мәсьәләләр бар – партия әгъзалары конференциядә әнә шушыларны хәл итү юнәлешендә эшләргә кирәклеккә басым ясады һәм карарлар кабул итте.

Чыгышлардан соң конференциядә катнашучылар партиянең җирле бүлекчәсе секретарен сайладылар. Яшерен тавыш бирү нәтиҗәсендә әлеге вазифага Мәҗит Салихов сайланды. Шулай ук бүлекчәнең сәяси советы, контроль-ревизия комиссиясе дә сайланды.

Гөлназ ГЫЙЗЗӘТУЛЛИНА