Нәтиҗәле эшләүче гаилә фермаларына 300 мең сум ярдәм

“Гаилә фермалары төзүгә алынучыларның елдан – ел артуы, авыл хуҗалыгына карата кызыксыну уянуы, дәүләт тарафыннан күрсәтелгән адреслы ярдәмнең нәтиҗәле булуын раслый”– диде Әлмәт муниципаль районы башлыгы Мәҗит Салихов Ерак Ямаш авылында эшли башлаган Игнатьевлар фермасы белән танышканнан соң.

9 ноябрь көнне бирегә килүенең максаты – реконструкцияләнгән ферма белән танышу, бу эшкә алынучылар белән аралашу иде.
Кагыйдә буларак, әлеге авыр һәм җаваплы эшкә алынучылар авыл хуҗалыгы тармаганда беренче ел гына түгел. Ия Игнатьева эшне тормыш иптәше Александр Тимофеев белән моннан 10 ел элек үзләренең шәхси хуҗалыгында бер – ике баш мал үстерүдән башлыйлар. Халыкта иткә генә түгел, сөткә дә ихтыяҗ булгач, савым сыерлары да асырый башлыйлар. Узган ел гамәлгә кергән “Гаилә фермалары” программасы кысаларында “Союз– Агро” хуҗалыгыннан буш яткан сарайны сатып алып, ныклап эшкә тотыналар. Ташландык хәлдәге бу бинаны мал тотарлык иткәнче шактый чыгымнар һәм көч түгәргә туры килә гаиләгә. Бүгенге көндә Тимофеевларның гаилә фермасында 40 баш мөгезле эре терлек исәпләнә,шуларның 29 ы савым сыерлары. Биредә ремонт эшләре әле дә дәвам итә, киләчәктә тирес чыгару, башка эшләрне механизацияләү бурычы тора.

“Лизинг– грант” буенча трактор алганнар, күптән түгел торак бирү шарты белән Түбн Кама районыннан килгән яшь гаиләне эшкә алганнар, хезмәт хакы түлиләр. Якын араларда мал башын 50 гә җиткерергә кирәк, шулай булмаганда чыгымнарны каплавы бик авыр диләр алар.
Район башлыгы әлеге гаилә фермасының эшчәнлегеннән канәгать калуын белдерде. Узган сессияләрнең берсендә депутатлар тарафыннан гаилә фермалары төзү белән нәтиҗәле шөгыльләнүчеләргә җирле бюджеттан 300 мең сум күләмендә ярдәм бирелүе турында әйтеп узды.
“Һәрбер фермерга түгел, чынлыкта да эшләргә теләге, мөмкинлеге булган, башкарма комитет тарафынна куелган таләпләрне үтәүчеләргә генә биреләчәк әлеге ярдәм.”, – дип ассызыклады ул. Киләсе дүшәмбедән Игнатьевларның исәп– хисап счетына әлеге акчалар күчереләчәк.

Фәрдия Хәсәнова
“Яшьләр змананы”