Татарстанда шикәр чөгендерен эшкәртү 2020 елның гыйнвар ахырына тәмамланачак

2019 елның 16 ноябре, шимбә

Республикада шикәр чөгендерен эшкәртү 2020 елның гыйнвары ахырына тәмамланачак. Бу хакта бүген ТР Хөкүмәте Йортында узган республика киңәшмәсендә ТР авыл хуҗалыгы һәм азык-төлек министрының беренче урынбасары Наил Залаков хәбәр итте.
Киңәшмәне барлык муниципаль районнар белән видеоконференцэлемтә режимында Татарстан Республикасы Президенты Рөстәм Миңнеханов уздырды. Анда шулай ук ТР Премьер-министры Алексей Песошин да катнашты.
Республикада сезонлы кыр эшләре барышы турында сөйләгәндә, Наил Залаков билгеләп үткәнчә, шикәр чөгендерен җыю төгәлләнде.

Татарстан Республикасы Авыл хуҗалыгы һәм азык-төлек министрлыгы мәгълүматларына караганда, республиканың шикәр заводларына 1,53 млн. тонна шикәр чөгендере китерелгән, бу барлык татлы тамыр җыюның 55% ын тәшкил итә.