Әлмәттә авыл хуҗалыгы һәм эшкәртү сәнәгате хезмәткәрләрен котладылар
Бүген Әлмәттә авыл хуҗалыгы һәм эшкәртү сәнәгате хезмәткәрләрен хөрмәтләү тантанасы булды.
Авыл халкы белән әлеге мизгелне уртаклашырга Әлмәт муниципаль районы башлыгы Тимур Нагуманов һәм Татарстан Республикасы Авыл хуҗалыгы һәм азык-төлек министрлыгының Терлекчелектә нәсел эше буенча Баш дәүләт авыл хуҗалыгы идарәсе башлыгы Ришат Зарипов килделәр.
Район башлыгы Тимур Нагуманов авыл хезмәтчәннәрен котлады. Ул үз чыгышында авыл хуҗалыгы – икътисадның иң мөһим секторларының берсе, дип билгеләп үтте. Җәмгыятьтә нинди генә үзгәрешләр булмасын, авыл хезмәтенә элеккечә ихтыяҗ зур һәм кирәк. Аграр предприятиеләр елдан-ел алдынгы технологияләрне һәм яңа техниканы кертеп, үз эшләрен камилләштерәләр. Ул шулай ук намуслы хезмәтләре өчен Әлмәт муниципаль районы Советы һәм Башкарма комитетының Рәхмәт хатларын тапшырды.