Искәртү – бездән, чаралар күрү – сездән

15 октябрьгә кадәр районда “Үз агачыңны утырт” акциясе дәвам итә. Димәк, һәркемнең шәһәребезне яшелләндерүгә үз өлешен кертү мөмкинлеге бермә-бер арта. Булдырганны сакларга күнекмәгән “куллары кычыткан” һәм мал-туарларын урамга караучысыз чыгарып җибәрүче битараф әлмәтлеләргә бераз басылырга кирәк булыр – аларга контроль көчәячәк.

Беренчеләрен әлегә сүз белән генә кисәтсәләр, соңгыларына үз малларын акчага “сатып алырга” туры киләчәк. Тиешле службалар тарафыннан уздырылучы рейдлар барышында “кайнар кул астына” эләккән йорт хайваннарын штраф түләп кенә кабаттан кайтарып алып булачак. Искәртү – бездән, нәтиҗәләр чыгару, чаралар күрү – сездән!

Дүшәмбе киңәшмәсендә Әлмәтне яшелләндерү, акция барышы турында Экология һәм табигатьтән файдалану департаменты начальнигы Альберт Маликовның чыгышыннан соң, район башлыгы Мәҗит Салихов югарыда аталган мәсьәләләрне күтәрде, яңа скверлардагы яшь үсентеләрне сакларга кирәклеккә күрсәтте. Баксаң, аларның кайберләре яңа да түгел икән әле. Акция игълан ителгән көнне яңа скверлар булдырылу турындагы хәбәргә киңәшмәдә ачыклык кертелде – аларга моннан күп еллар элек нигез салынган булган. Әмма ел саен бер үк тырмага басабыз булып чыкты – утыртабыз да, онытабыз, нәтиҗәдә, агачлар сусызлыктан корый, берәүләр сындыра, икенчеләр кәҗәләрен яшеллек белән туенырга чыгара. Болай барса, скверлар һәрвакыт “яңа” булачак әле.

Теманы дәвам итеп, яшеллекне “күрмәүче” машина хуҗаларын да “чеметтереп аласы” килә. Газоннарга менергә күнеккәннәр “бәхет хаты” алмый торып, бу гамәлләреннән кире кайтмас ахры. Район башлыгы сүзләренә караганда, башка шәһәрләрдә дә безнең тәҗрибәне куллана башлаячаклар – бу уңайлы да, тәртип бозучыларны туры юлга этәрү өчен тәрбияви чара да.

Дүшәмбе киңәшмәсендә калган мәсьәләләр дә тикшерелде. Хезмәтне саклау – шуларның берсе. Ел башыннан безнең җирлектә производствода 4 бәхетсезлек очрагы теркәлгән, шул исәптән икесе үлемгә китергән. Республикадагы 52 очракның 30 ында кеше гомере өзелгән. Куркынычсызлык кагыйдәләрен саклауга бармак аша карау нәтиҗәсеме бу, әллә инструктажны тиешле дәрәҗәдә уздырмаумы? ТР Президенты контролендә торган бу юнәлеш буенча эшчәнлекне көчәйтү зарур, шулай итмәгәндә, зыян күрүчеләр исемлеге киңәергә мөмкин.

Гөлназ ГЫЙЗЗӘТУЛЛИНА