Әлмәттә физик культура һәм спорт өлкәсендә кадрлар әзерләү мәсьәләсе буенча фикер алыштылар
Район активы белән узган киңәшмәдә Әлмәт физик культура колледжы директоры Илдус Гайфуллинның чыгышы тыңланды.
Ул уку йортының эшчәнлеге белән таныштырды.
Илдус Миннәхмәтович билгеләгәнчә, бүген колледж - Татарстан Республикасында физик культура, спорт һәм туризм өлкәсендә кадрлар әзерләү буенча әйдәп баручы урта һөнәри белем бирү учреждениеләренең берсе. Биредә Татарстан Республикасыннан гына түгел, Россия Федерациясенең башка төбәкләреннән дә 220 кеше белем ала.
Хәзер анда спорт мастерлыгына унбиш кандидат һәм Россиянең дүрт спорт мастеры белем ала.
Район башлыгы Тимур Нагуманов ремонт эшләренең барышын даими контрольдә тотарга кирәклеген искәртте. Ул шулай ук уку йортын тәмамлаучыларга алга таба белем бирү юнәлеше буенча эшкә урнашу планында аерым игътибар бирергә кушты.