Р.Борһанов: “Тест ярышлары - безнең функциональ әзерлегебезне сынау мөмкинлеге”

2013 елгы Универсиада башкаласы соңгы ике атнада халыкара дәрәҗәдәге өч спорт ярышын кабул итә

2013 елгы Универсиада башкаласы соңгы ике атнада халыкара дәрәҗәдәге өч спорт ярышын кабул итә. Казанда студентлар арасында байдаркаларда һәм каноэларда ишү буенча дөнья чемпионаты әле 31 августта гына тәмамланган иде. Бүген башкалада ату буенча студентлар арасында IV дөнья чемпионаты старт ала. Бу атнада Татарстан мәркәзендә студентлар арасында академик ишү буенча дөнья беренчелеге дә узачак. Әлеге спорт төрләренең барысы да 2013 елгы җәйге Универсиада программасына кертелгән һәм бу тест ярышлары Универсиада алдыннан Казанның әзерлеген ныклы сынау чарасы. “Тест ярышлары - безнең функциональ әзерлегебезне сынау мөмкинлеге”, -ди ТР яшьләр эшләре, спорт һәм туризм министры Рафис Борһанов. Ул бу хакта бүген ТР Хөкүмәт йортында узган брифингта белдерде. Тест ярышларын уздыру темасына багышланган матбугат очрашуында шулай ук “Казан 2013” Башкарма дирекциясе генераль директоры Владимир Леонов, ФИСУ башкарма комитеты әгъзасы Верена Бурк белән ФИСУның Студетларның дөнья чемпионатлары дирекциясе җитәкчесе Пауло Феррейро катнашты.

 Казан узган ел да кайбер спорт төрләре буенча тест ярышларын кабул иткән иде инде. Аерым алганда, пляж волейболы буенча берничә турнир, авыр атлетика, өстәл теннисы буенча Европа чемпионатлары һ.б. узды. “Без, Универсиаданы оештыручылар өчен, тест ярышлары барлык юнәлешләрдә -спорт делегацияләреннән заявкалар кабул итү, спортчылар һәм хөкемдарларны кабул итү, аккредитацияләүдән алып, ярышларны мәгълүмати яктан тәэмин итү, билетлар сату, тамашачыларга уңайлыклар тудыруга кадәр функциональ әзерлегебезне сынау мөмкинлеге”, - дип ассызыклады Рафис Борһанов.

Быелгы халыкара сынау ярышларын оештыруга ТР Яшьләр эшләре, спорт һәм туризм, “Казан 2013” Башкарма дирекциясеннән тыш башка күп кенә профильле министрлык-ведомстволар да җәлеп ителгән. Мәсәлән, Мәгълүматлаштыру һәм элемтә министрлыгы чемпионатны оештыручыларның нәтиҗәле эшчәнлеген тәэмин итү өчен, автоматлаштырылган берничә мәгълүмат системасын сыный башлаган.

Сәнәгать һәм сәүдә, Төзелеш, архитектура һәм торак-коммуналь хуҗалык министрлыклары дөнья чемпионатлары уздырыла торган объектларны тоткарлыксыз электр энергиясе белән тәэмин итү өчен җаваплылыкны алган. ТР буенча Эчке эшләр министрлыгы барлык спорт һәм шәһәр инфраструктурасы иминлеге өчен җаваплы. Рафис Борһанов 27 августтан 9 сентябрьгә кадәр өч спорт төре буенча Казанда узучы дөнья чемпионатларын үзенә күрә бер чакыру дип бәяләде. “Әлеге ярышлар барлык министрлык, ведомстволардан югары әзерлек һәм дисциплина таләп итә”, - дип искәртте ул.

 Тест ярышлары барышында оештыручылар эшчәнлеген ФИСУның техник делегатлары, әлеге спорт төрләренең халыкара федерацияләре экспертлары координацияли.

 Бүгенге очрашуда катнашкан ФИСУның Студетларның дөнья чемпионатлары дирекциясе җитәкчесе Пауло Феррейро Казанның тест ярышларын уздыруга әзерелегеннән канәгать калуын белдерде. Ул тест ярышларының оештыручыларга да, Халыкара студентлар спорты федерациясе вәкилләренә дә ярышларны оештыру һәм үткәрүдә зур тәҗрибә тупларга ярдәм итүен ассызыклады. Аның сүзләренә караганда, академик ишү, байдаркаларда һәм каноэда ишү, ату спорты иң катлаулы спорт төрләреннән санала. Спорт кирәк-яракларын таможня аша уздырганда, транспортировкалаганда да шактый мәшәкатьләр тудыра торган спорт төрләре бу. Бүгенге брифингта ассызыклаганганча, тест ярышлары өчен Казанның шушы катлаулы спорт төрләрен сайлавы очраклы түгел. Шушындый катлаулы ярышлар оештыручыларны, хезмәт күрсәтүче персоналга зур тәҗрибә бирә.