Миллионер табибә

Бүген сәламәтлек саклау системасының бөтен тармакларында да яңарыш бара. Бигрәк тә хөкүмәт даирәләренең авыл медпунктларына йөз белән борылуы сөендерә. Авыл җирлекләрендә яшәү шартларын яхшырту, учреждениеләрне кадрлар белән тәэмин итү юнәлешендә 2011 елның 22 ноябрендә Россия Федерациясе Дәүләт Думасы Федераль Собраниесе тарафыннан "Мәҗбүри медицина иминияте" турындагы законга үзгәрешләр кертелү шушы эшнең бер юнәлеше.

Программа кысаларында 35 яшькә кадәрге, югары медицина белеме булган һәрбер табиб авыл җирлегенә эшкә кайткан очракта 1 миллион сум күләмендә бер тапкыр бирелә торган компенсация алу хокукына ия. 2012 елның 23 январендә ТР Министрлар Кабинеты карары нигезендә әлеге суммага торак шартларын яхшырту өчен тагы 100 мең сум өстәлде. Хөкүмәттән мондый ярдәм алган очракта табиб әлеге урында кимендә 5 ел эшләргә тиеш.

Программа күптән түгел генә эшли башласа да, җәмәгатьчелек тормышына киң колач белән кереп китте. 2012 елда Әлмәт муниципаль районы буенча әлеге Федераль программа кысаларында 6 табиб эшкә кайткан, шуларның 3 се 1100 млн сум күләмендә компенсация алган инде.

Агымдагы елдан башлап Габдрахман, Яңа Кәшер, Акташ ( 2 табиб), Кәләй, Кузайкино авылы сәламәтлек учреждениеләрендә даими рәвештә терапевтлар эшләячәк.
25 июль көнне без шушы программада беренчеләрдән булып катнашып, Габдрахман авылы амбулаториясенә табиб-стоматолог булып эшкә кайткан Брагина Равилә Равил кызы белн таныштык.

Чыгышы белән ул Әлмәт кызы. 2009 елда Казан дәүләт медицина университетын тәмамлагач шәхси клиникада эшли. Яңалыклардан әлеге программа турында ишеткәч тә районның Сәламәтлек саклау идарәсенә кайтып җитәкчелек белән сөйләшә, бәйгегә документлар тапшыра.
- Габдрахманга кайтып эшли башлавыма бик сөенәм. Иремнең әти- әнисе дә шушы авылдан. Бүгенге көндә гаиләбез белән шунда яшибез. Хөкүмәт тарафыннан бирелгән 1 миллионны торак шартларын яхшыртуга тотачакбыз, - ди Равилә.

"Авыл докторлары" ның эш шартлары менә дигән. Бинаның эче дә, тышы да ялт итеп тора. Барлык кабинетлар да кирәкле җиһазлар белән тәэмин ителгән.

Габдрахманда яңадан врач - стоматолог эшли башлавына халык та бик сөенә. Тешләрне дәвалау өчен хәзер шәһәргә дә, Мактамага да барасы юк. Без килгәндә дә үз чиратлары җиткәнне сабыр гына көтеп коридорда шактый кеше утыра иде. Чират буенча, алдан язылып көненә 5-6 клиент кабул итәләр.

Мондый уңай үзгәрешләр районыбызның башка авылларын да читләтеп узмас, тиздән башка торак пунктларның да үз табиблары булыр әле.

Ф. ХӘСӘНОВА