Игелек кыл да суга сал, халык белмәсә балык, балык белмәсә, Ходай белер!

Бу елның узган 6 аенда Әлмәт шәһәре һәм район предприятиеләре тарафыннан төбәктәге мохтаҗларга 65 млн сумнан артык суммага хәйрия ярдәме күрсәтелгән. Социаль яклау идарәсе мәгълуматларынча, аларның 10 млн сумнан артыгы инвалидларны дәвалау һәм тернәкләндерү өчен тотылган. Бүген Яшьләр үзәгендә шундый хәйрия чараларының чираттагысы узды.

5 яшендә юл-транспорт һәлакәтендә алган тән җәрәхәтләреннән соң йөрү сәләтен югалткан 17 яшьлек Богдан Моховны дәвалау максатында оештырылды бу чара. Богданның бөтен хыялы туган каласын үз аякларында әйләнеп узу. Егет аякка баса алсын өчен аңа Германиядә кыйммәтле дәвалану курслары узарга кирәк.

Оештыручыларның берсе социаль яклау идарәсе җитәкчесе Закирҗан Шакирҗанов белдергәнчә, мондый чараларга акча җирле бюджетта да, хөкүмәт тарафыннан да каралмаган; мондый катлаулы операцияне түләүсез ясаучылар да юк. Шуңа күрә дә идарә хәйрия марафонына чакырып 40 тан артык предприятиегә мөрәҗәгать иткән. Бигрәктә банклар һәм шәхси эшмәкәрләр теләктәшлек күрсәтте, ди Закирҗан Шакирҗанов.

Хәйрия чарасына килүчеләр арасында кеше кайгысына битараф булмаган өлкән буын вәкилләрен дә күрергә мөмкин иде. Шәмсулла абый Насыйбуллин да шулар арасында. “Алкогольгә акча җәлләми халык, сәламәтлеккә тиенмәгән кешегә ярдәмгә кызгана”, дип борчылуын белдерде ул.

12 ел буе төрле хастаханәләрдә, тернәкләнү үзәкләрендә йөреп тә яшәү дәртен югалтмаган бу батыр егет мәктәптә “5” ле билгеләренә укый, кулланма-сәнгать эшләнмәләре буенча шәһәр һәм республика бәйгеләре җиңүчесе. Бүгенге марафон аңа сәламәтлек бүләк итәр дип ышаныйк!

Көндезге сәгать 12 гә марафон барышында һәм алдарак бирелгән игъланнар буенча күчерелгәннәрне дә исәпкә алып Богдан Моховка ярдәмгә 300 мең сумга якын акча җыелды. Күмәк көче булса, киез казык җиргә керер, дигән борынгылар.

Ләйләгөл Минаева
“Болгар” радиосы