Бурычлы үлмәс, ләкин көн дә күрмәс

Әлмәттә торак-коммуналь хезмәтләр өчен түләүләр узган айда 100 процент тәшкил иткән. Әлегә бу - яхшы күрсәткеч дияргә нигез юк.

Торак-коммуналь хуҗалык тармагына хезмәт күрсәтүчеләр белән даими узган очрашулар нәтиҗәсе буларак шәһәрдә июнь аенда җыемнар ниһаять 100 процент чигенә килеп җиткән. Башкарма комитет җитәкчесе Марат Гыйрфанов сүзләренчә, бу соңгы чик түгел. Узган айларда җыелган бурыч күләмен исәпкә алсаң, коммуналь хезмәтләр өчен җыемнар һәр идарәче компаниядә 100 проценттан күпкә артык булырга тиеш. Бу хакта торак-коммуналь хезмәтләр өчен җыелган бурычны бетерү буенча комиссиянең чираттагы утырышында әйтелде.

Коммуналь хезмәтләр өчен 107-129 процент җыемны 4 идарәче компания генә тәэмин итә алган. Исемлектә 90-93 процент белән канәгатьләнүчеләр дә бар. Утырышта әйтелгәнчә, идарәче компанияләр һәм ТСЖларның Әлмәт җылылык челтәре предприятиесенә бурычы 75 млн сум тәшкил итә. Водоканалга бирәчәкләре 55 млн сум күләмендә. Кулланган су өчен акча түләмәүчеләр исемлегендә үз йортлары белән торучылар 59. Аларның июнь аенда предприятиегә бурычлары 172 мең сумга җыелган. Бу категория белән көрәшүнең үтемле юлын тапкан Водоканал. Су бирүне өзү белән 59 бурычлының 56 сы 160 мең сум күләмендәге бурычларын бик тиз арада каплаган.

Элегрәк Гафиятуллин урамындагы 2 нче йортта яшәүче коммуналь хезмәтләр өчен бурычы зур булган бер гаилә фатирыннан кечерәк мәйданлы башка торакка күчерелгән иде.