Әлмәтнең күпбалалы 115 гаиләсе шәхси торак төзелеше өчен урын сайлады

Әлмәтнең күпбалалы 115 гаиләсе шәхси торак төзелеше өчен урын сайлады. Мәгълум булганча, Федераль Закон буенча күп балалы гаиләләргә йорт төзү өчен бушлай җир алу мөмкинлеге бирелә. Алар җирне даими яши торган шәһәр яки авыл биләмәләрендә сайларга хокуклы.

Бүгенге көндә район территориясендә 3 һәм аннан да күбрәк баласы булган 1218 гаилә исәпләнә. Торак төзелеше өчен җир алу теләге белдереп, шуларның 922 се мөрәҗәгать иткән. Муниципаль районның җир һәм мөлкәт мөнәсәбәтләре палатасы мәгълуматларынча, 880 нән артык җир участогы межаланган, шуларның 4 сеннән кала барысы да кадастр исәбенә дә куелган.

Җир участокларының зур өлеше шәһәр тибындагы Түбән Мактама бистәсендә 580 ләп участок. Аннан кала РТС районы. Ә иң популяр урын Урсала бистәсе. Андагы 100 ләп участокның 96 сына хуҗа табылган инде.

Җир мөнәсәбәтләре бүлеге җитәкчесе Гөлчәчәк Гафиатуллина белдергенчә, җир сайлау буенча 2 процедура узган. Анда 120 гаилә катнашкан. Гариза язучыларны иң элек картографик материаллар белән таныштырганнар. Җирнең кай тирәдә икәнен чамалап ризалык бирүчеләрне, ягъни булачак хуҗаларны соңыннан җир участокларына алып барганнар. 3 гаилә булачак нигез урынын ошатмый баш тарткан.

Әлмәттә чираттагы участок сайлау процедурасы июль урталарында узачак.

Ләйләгөл Минаева