Алтын һәм көмеш медальләр чыңы

  Әле күптән түгел генә”Соңгы кыңгырау “бәйрәмнәрен билгеләп узган идек. Ул вакытта без чыгарылыш сыйныф укучыларына БДИ уңышлы биреп, укуларын яхшы гына төгәлләүләрен теләдек. Бүген исә барысы да артта калды. Бигрәк тә мәктәпне алтын һәм көмеш медальгә тәмамлаган “алтын яшьләр”нең сөенечләре зур. 21 июнь көнне еллар дәвамында формалашкан матур традицияне дәвам итеп, район һәм шәһәребезнең интеллектуаль потенциалы бу юлы Әлмәт татар драма театрына җыелды. Агымдагы елда район һәм шәһәребез мәктәпләрен 1064 укучы тәмамлады. Шуларның 57се - алтын, 39ы көмеш медаль ияләре. Талантлы кеше бөтен өлкәдә дә талантлы диләр. Тормышларының беренче этабын уңышлы башлап җибәргән сәләтле, акыллы, тырыш бу егет-кызлар, чын мәгънәсендә, республикабыз, илебезнең киләчәге.

Алтын һәм көмеш медаль ияләренә үзенең тәбрикләү сүзләрен беренчеләрдән булып Әлмәт муниципаль районы башлыгы М.Х.Салихов җиткерде.

- Бүген барыбыз өчен дә истәлекле,тантаналы көн. Хөрмәтле укучылар! Кулларыгыздагы алтын һәм көмеш медальләр дистә еллар дәвамында куйган көндәлек хезмәтегез,йокысыз төннәр, тырышлыгыгыз нәтиҗәсе.Бердәм дәүләт ихтиханнарын уңышлы тапшырып, сез үзегезгә һәм башкаларга бу югары бүләккә лаеклы булуыгызны тагы бер кат расладыгыз. Без сезнең белән чын мәгънәсендә горурланабыз. Инде алдыгызда чираттагы олы сынау тора. Үзегез теләгән уку йортларына кереп, киләчәгегезне билгеләрлек, потенциалыгызны тулысынча файдалана алырлык һөнәр сайлагыз.

Мәҗит Хаҗипович белем бирүдә нәтиҗәле эшләп, югары күрсәткечләргә ирешкән педагогик коллективлар, аларның директорларына, укытучыларга да олы рәхмәт сүзләрен җиткерде.

Бәйрәмнең иң тантаналы өлеше, әлбәттә, медалистлар белән танышу. Шундый олы исемгә лаек булулары белән үзләре белем алган мәктәпне, гимназияне, лицейны данлаучы бу укучылар чиксез хөрмәт һәм горурлык хисләре уята. Менә алар - иң күп “йолдызчыклы” белем бирү учреждениеләре: 2 нче лицей(10 медалист),1 нче гимназия (9 медалист),17 мәктәп (6 медалист) һәм башкалар.

Медалистлар исеменнән җавап сүзе белән 7 нче мәктәптә белем алган, республика,Россия күләмендә уздырылган олимпиада җиңүчесе,”Яшь академик” исеменә лаек булган укучы Денис Детисов һәм 1 нче гимназиядән Регина Сабирова чыгыш ясадылар. Алар төрле югарылыкта узган олимпиада һәм бәйгеләрдә катнашу мөмкинлеге булдырганнары, һәрбер башлангычны хуплап алып ярдәм иткәннәре өчен район җитәкчелегенә, Мәгариф идарәсенә, мәктәп коллективына, укытучыларга һәм,әлбәттә инде, әти-әниләргә олы рәхмәтләрен әйттеләр,район башлыгына истәлекле бүләк тапшырдылар.

Район башлыгы Гранты иясе, югары хезмәт нәтиҗәләренә ирешкән 17 нче мәктәп укытучысы Л.Н.Попова барлык педагоглар исеменнән медалистларны тәбрикләп,хәер–фатихасын бирде.

– Киләчәк тормышыгызда да ышанып таяныр ноктагыз булсын.Бүгеннән олы тормышка старт алдыгыз, хәерле юл сезгә! –диде ул залдагыларга мөрәҗәгать итеп.

“Альком” фирмасы ( директоры Р.А.Мансуров) һәр ел саен иң тырыш һәм зур җиңүләргә ирешкән укучыга соңгы модель компьютер бүләк итеп, “алтын яшьләребезне” үстерүгә үзеннән өлеш кертә. Быел әлеге бүләккә Денис Детисов лаек булды. Аны Мәгариф идарәсе җитәкчесе Н.М.Хәйдәрова тапшырды һәм медалистларга үзенең рәхмәт сүзләрен, чын йөрәктән әйтелгән теләкләрен җиткерде.

Бәйрәмнән соң барлык медалистлар һәм район җитәкчелегенең бергәләп фотога төшүе район һәм шәһәребезнең елъязмасына тагы бер яңа бит булып өстәлде һәм тарихта үз урынын алды.