Әлмәт муниципаль районы һәм Әлмәт шәһәре

Интеллектуаллар бәйрәме

2012 елның 16 мае, чәршәмбе

Башкарган хезмәтеңнең, эшеңнең нәтиҗәсе үзеңә һәм җәмгыятькә файда китерүдән тыш тиешенчә бәяләнсә генә, тулы канәгатьләнү хисе буладыр. 15 май көнне Балалар һәм яшүсмерләр иҗаты үзәгендә узган фән олимпиадаларында җиңүчеләр слеты әлеге фикерләребезне тагы бер кат раслады.

Традицион рәвештә һәр уку елы азагында уздырылган бу чара быел да бик үзенчәлекле булды. Әлмәт муниципаль районы мәктәпләрендә тәрбияләнүчеләр яңадан-яңа уңышлары белән нефть башкаласының абруен күтәрә. Узган уку елларында бөтенроссия олимпиадаларының региональ турлары, республика ярышларында яуланган җиңүләр саны 40, бу узган елгыдан 15кә артык дигән сүз. Гомуми күрсәткечләр буенча район "алтын унлык"та.

Район һәм шәһәребезнең “алтын акылларын” тәбрикләргә Әлмәт муниципаль районы башлыгы М.Х.Салихов килгән иде. Ул фән олимпиадаларының талантлы балаларны ачыкларга, мәктәп укучыларының мөмкинлекләрен сынарга, төрле яктан үсәргә яңа мөмкинлекләр ачуын ассызыклап узды, интеллектуаль хезмәтегезнең нәтиҗәләре киләчәк тормышыгызның уңышлы башлангычы булсын дигән теләкләрен җиткерде. Укучылары муниципаль, республика, бөтенроссия олимпиадаларының региональ турларында катнашып призлы урыннарга лаек булган укытучыларга сертификатлар тапшырды.

Татарстан республикасының атказанган укытучысы, "Татнефть" ААҖ каршысында эшләп килүче "Сәләтле бала" фонды комиссиясе рәисе Л.А.Садчикова сүзләренә караганда, "Сәләтле бала" хәйрия фонды 9 ел инде акыллы, сәләтле балаларны үстерүгә, кызыксындыруга хезмәт итә. “Мин сезнең алга таба да хезмәт, иҗат итүегезне телим. Үз казаныгызда гына кайнамагыз, алган белемнәрегезне, тәҗрибәгезне башкаларга, җәмгыятькә файда китерерлек итеп уртаклашыгыз”,– диде ул. Бәйгеләрдә призлы урыннар яулаган "алтын яшьләребез"гә фондның махсус премияләрен тапшырды.

Укытучылар исеменнән чыгыш ясаган 2 нче лицейның рус теле һәм әдәбияты укытучысы М.Б.Зеленина төрле югарылыктагы ярышларда катнашырга, профессиональ яктан үсәргә мөмкинлек булдырганнары, һәрьяклап ярдәм күрсәткәннәре өчен район, "Татнефть" ААҖ җитәкчелегенә, Мәгариф идарәсенә олы рәхмәт сүзләрен җиткерде.

Рус, немец телләре, биология фәне буенча бөтенроссия, региональ этапларның җиңүчесе, 16 нчы мәктәп укучысы Әлфия Зәбирова чын мәгънәсендә, районыбыз горурлыгы. Үзенә сүз бирелгәч тә укытучыларга, әти-әниләргә олы рәхмәт сүзләрен әйтеп, олимпиадаларда катнашуның никадәрле кызык һәм файдалы булуын ассызыклады, яшьтәшләрен актив булырга чакырды.

Укучыларның фән олимпиадаларында җиңүләрендә алар укый торган белем бирү учреждениеләренең роле, әлбәттә, бик зур. Республика, бөтенроссия бәйгеләрендә җиңүчеләрне иң күп күләмдә әзерләүчеләр булып шәһәребезнең 1 нче гимназиясе(9 урын), 2 нче лицей(5 урын), 17 нче мәктәп (4 урын), 1 нче лицей, 16 ,23, 7, 24, 4 нче мәктәпләр исәпләнә.

Олимпиадада җиңүчеләрне тәбрикләү тантанасы район башлыгы грантына лаек булган мөгаллим һәм мөгаллимәләрнең иң яхшы укучыларга истәлекле тасмалар кидерүе белән тәмамланды.

Фәрдия Хәсәнова ,

“Яшьләр заманы” газетасы

ФОТОРЕПОРТАЖНЫ КАРАУ Фоторепортаж

БАРЛЫК ЯҢАЛЫКЛАРНЫ УКУ