Әлмәт муниципаль районы һәм Әлмәт шәһәре

Әлмәтнең туган якны өйрәнү музее бүген “Сумка...” дип аталган күргәзмә ачты

2012 елның 18 апреле, чәршәмбе

1982 нче елда ЮНЕСКО каршында оешкан һәйкәлләрне саклау буенча Халыкара совет Ассамлеясы 18 апрельне - һәйкәлләр һәм тарихи урыннар көне дип игълан итте. Шул вакыттан алып бу көн – ЮНЕСКО га кергән күп илләрдә, шул исәптән Россиядә дә билгеләп үтелә. “Тарихи Ватаныбызны саклыйк”. Быелгы чаралар шундый шигарь белән үтә.

Рәсәйдә якынча исәпләүләр белән федераль һәм төбәкләр карамагындагы 150 мең мәдәни мирас объекты исәпләнә. Әлмәттә 11 тарихи, 78 археологик һәйкәл бар. Шәһәрнең Татарстан нефтен үзләштерү белән бәйле мәшһүр шәхесләренә 9 мемориаль такта куелган. Бөек Ватан сугышы ветераннары истәлегенә куелган һәйкәлләр 70 тәк артык. Монументаль сәнгать һәйкәлләре 25.

Халыкара һәйкәлләр һәм тарихи урыннар көне уңаеннан төбәкнең үткәне, бүгенгесе белән бәйле ядкарькәрләр сагында торучы Әлмәтнең туган якны өйрәнү музее бүген “Сумка...” дип аталган күргәзмә ачты.

Анда XVIII-XIX гасырда чыккан сумка, акча янгчыгы, култык букчаларыннан алып бүгенге көндэ кулланылышта булган ятмә сумкалар, чемоданнар бар.

Әлмәт туган якны өйрәнү музее фондларыннан тыш экспонатлар авыл музейларыннан да җыелган. Иң тарихи экспонатларның берничәсен Кичучаттагы Риза Фэхреддин мемориаль музее директоры Диләрә Гыймранова алып килгән.

Сугыштан соңгы елларда Елховой авылын күтәргән җитәкче Мусин Гыйльметдиннең авыл музеенда сакланган планшеты тарихы да кызыклы. Бу трофей. 1943 нче елда Гыйльметдин ага әсирлеккә алган немец офицерының яшерен документлар салган планшеты ул. Кургәзмәгә шулай ук юкә кабыгыннан ясалган урманчы букчалары, керосин ташу өчен ясалганнары, тактадан ясалган шәкерт портфельләре куелган.

Күргәзмә 18 майга кадәр дәвам итә. Экспозиция белщн танышырга теләүчеләр сумкаларын музейга бүләк итә ала. Бүген “Знамя труда” гәҗите хезмәткәре Лилия Седельникова 2005 нче елда журналист кәсебенә керешкәндә алган кечкенә сумкасын фондка бүләк итеп калдырды.

Л. Минаева

“Болгар” радиосы

БАРЛЫК ЯҢАЛЫКЛАРНЫ УКУ