Әлмәт муниципаль районы һәм Әлмәт шәһәре

Балигъ булмаган тоткыннар трагедиясен истә тотарга бурычлыбыз

2012 елның 12 апреле, пәнҗешәмбе

11 апрель көнне бөтен дөнья фашист концлагерьлары корбаннарын искә алды. Бүген Әлмәтнең дәүләт муниципаль хезмәт институтында Әлмәт җирлегендә гомер кичерүче 1945 нче елга кадәр Германия территориясендә тоткында булучыларны хөрмәтләделәр.

Лидия Михайловна Хуҗинаны немец гаскәрләре 5 яшендә Крымнан 1943 нче елда Германия алып китә. Аның белән бергә 8 яшькә өлкән апасы, әнисе һәм үги әтисе дә илбасарлар җирендәге хәрби заводка эләгә. Бомбага тотылган заводта әниләре һәлак була. Үги әтиләре турында бернинди мәгълумат юк. Бу сынаулардан ике кыз бала 1945 нче елда котыла. Апасы белән Лидия ханым Севасптопольдәге балалар йортына эләгә.

Бүгенге көндә Әлмәт муниципаль районы территориясендә концлагерьларның балигъ булмаган тоткыны саналган 14 кеше яши. Аларның 8 хезмәт ветераны, берсе Ватан сугышы ветераны толы, 5 се инвалид. Фашист концлагерьлары тоткыннарын искәалу уңаеннан һәм Бөек Җинүнен 67 еллыгын билгеләп үтү чаралары кысаларында Әлмәт дәүләт муниципаль хезмәт институтының актлар залында оештырылган кичәгә аларның 8 килгән иде.

Бүгенге буын балигъ булмаган тоткыннар трагедиясен истә тотарга бурычлы. Ул вакытта 1907 нче елгы Гаага Конвенциясе нигезләмәләрен бозып концлагерьларда, хәэрби заводларда, сәнәгать һәм авыл хуҗалыгы предприятиеләрендә сабыйлар хезмәте кулланылды. Каты режим шартларында аларның саулыклары какшады, гомерләре өзелде. Балалар җинаятьчел медицина экспериментлары өчен донор да, биологик чимал да булды, дип искэ алдылар чыгыш ясаучылар. Тоткын булу хәсрәтен кичергән абый-апаларга муниципалитет һәм социаль яклау идарәсенең истәлек бүләкләре тапшырылды. Алар өчен студентлар концерт программасы әзерләгән.

Ләйләгөл Минаева

“Болгар” радиосы

БАРЛЫК ЯҢАЛЫКЛАРНЫ УКУ